الزوجة الرابعة والزنجبيل الاخوانى

دعانى احد امناء حزب الاخوان - ترددت كثيرا - ولكنه أَلح ،إلحاحًا ،قلت اروح يمكن يشغل دماغه ويفهم حاجه بدل ماهو عامل زى العربية الطس وماشي فى اتجاه واحد.
رحب بى .... اخذنى بالاحضان - وبالقبلات . وجدته بلا لحيه ولا شارب.
سألنى تشرب ايه "ياباشا":
- قلت قهوة سادة.
- قال ماتشرب زنجبيل أحسن.
- قلت :بيحرق فى القصبة التنفسية ..
قال : خلاص اشرب حلبه حصي أفضل!!
- فلت صارخا هو انا حامل يامولانا ..
قال بهدو : اجبلك بردقوش ..
نفخت .. واشعلت سيجارة .
قال : ألم تعلم ان السجائر رجس من عمل الشيطان .
قلت : هو الشيطان اللى صنعها ؟خلاص  هات شيشة .
قال : انت كمان بدخن شيشة .. الشيشة حرام ..
قلت فى نفسي .. النهاردة اسود ....هو الراجل ده ماسك مفاتيح الجنة والنار .
اتسعت عيناه ونظر لى نظرة كأنه يحاول ان يفهم ما يدور بخلدى .ثم تركنى وخرج بعد ان سمعت نقرا على باب المطبخ وجاء بكوب بردقوش .. وضعه امامى وهو يقول:البردقوش مفيد و يساعد على طرد الغازات... وضد التشنج وارتفاع ضغط الشرايين , والارق...
قلت : علشان كدا انت بتشربه على طول .. لكنى اسمع غازات كريهة تخرج من حجرات البيت .!!
قال ضحكا .. بارك الله فيك يا أخى انهم زوجاتى .
قلت : كم عددهم ؟
قال ثلاثة
قلت : والرابعة امته؟
قال : هو دا الموضوع اللى انا عايزيك فيه .
قلت : عايزنى اشوفلك عروسة .؟
قال : مشاء الله على عقلك وعلى فراستك. صحيح المؤمن كيس فطن.
- قلت - طيب ما انت كنت فى رابعة كنت اتجوز من رابعة الرابعة.
قال : مالحقتش منهم لله كنت خلاص حاتجوز ببلاش ،.
ثم تركنى بعد ان سمع نقرتين على الباب .. ورجع بطبق فيه عسل .. وضعه امامى وهو يقول فيه شفاء للناس انه شهد ممزوج بغذاء ملكات النحل .. مفيد لحالات البرود الجنسي.... ويؤخر أعراض الشيخوخة.
قلت - دا انت محل اعشاب على كدا- تعرف نبات اليوهمبي؟
قال ضاحكا :الله يلعنهم بتوع غرب إفريقيا.. اصبح اليوهمبي مهدد بالانقراض نتيجة استعملهم الجائر له.
قلت :وانت زعلان قوي كدا ليه ؟
قال :اليوهيمبي دا مهم قوى... وكثيرا من الناس لا يعرفون قيمته .. واخشي ان لن نجده بعد ذلك انه مقوى ويساعد في علاج قصور الانتصاب!!،
قلت : هو انت مافيش فى دماغك الا الموضوع ده؟
قال : شوف الجزيرة بتقول ايه .
وتركنى وخرج بعد ان سمعنا النقرة الثالثة.
جلست اشاهد قناة الجزيرة - وجدتها هى الاخري كا لسيارة الطس التى تسير فى اتجاه واحد .
عاد الرجل وبيده طبق وقال وهو يضعه امامى ... دا تمر هندى يساعد على طرد الديدان المعوية.
قلت : ايه الموضوع بالظبط - احنا عايشين فى مستنقع ... وبعدين قولى .. ايه موضوع النقرة الاولى - والثانية - والثالثة .
ضحك وهو يقول . كل زوجة ولها نقرة معينة . الزوجة الاولى لها نقرة واحدة - والثانية نقرتين والثالثة . قلت مقاطعا لها ثلاثة نقرات .
قال : بارك الله فيك ....
قلت : ولماذا تريد الرايعة ؟وانت معلق شارة رابعة فى كل خرم فى البيت!!
- قال:هذه نقرة وتلك نقرة أخري ،اما ان كنت تريد ان تعلم لماذا اريد الزواج من الرابعة .
-  قاطعته لأغلق هذا الحوار السخيف و قبل أن أنفجر حاولت تصنع الابتسامة وقلت:حاتقولى الشرع حلل أر..
- وقبل ان اكمل الكلمة قال - باراك الله فيك ... واسمع ياسيدى السبب الاخر .
- قلت هات ماعندك!
- قال اما الاولى فقد تزوجتها لعمل المشاريب النبوية من الاعشاب ،. والثانية لعمل المشهيات والمقويات ... والثالثة لعمل الفاكهة .
قلت ولماذا تريد الرابعة ؟
قال لعمل الطعام
- قلت يعنى مافيش غداء النهاردة
- قال : اما تجوزنى الرابعة.
------------

نشر فى:
الجمهورية والعالم

جريدة شباب مصر

وكالة قدس نت للانباء

الحوار المتمدن

فلسطين بيتنا

أمد للاعلام

-->