نظرة ساخرة من حمار فرشوطي على أوضاع الوطن

قال لي حماري ياواد يامفرشط؛

تعرف حاجه عن الغم الدكر؟

قال لي حماري: "ياواد يا مفرشط، تعرف حاجة عن الغم الدكر؟ إذا ماكنتش تعرف، اسأل حمارك اللي ماشي معاك عن رأيه في الناس اللي عايزه تستحمرنا وتحولنا لخناجر نردد وراها إن الديمقراطية ردة وكفر وزندقة، وإن الليبرالية ضلال وانحلال، وإن المرأة عورة، وإن الثورة انقلاب."

استمر الحمار في كلامه، وقال: "شوف لنا كدا حد يعرف يقولنا رأيه في الفشل الكلوي والكبدي والفشل التعليمي والفشل الإداري. يقولنا رأيه في الفقر الدكر وفي الغش وفي المعيشة وفي الرشوة، وفي النفاق والرياء والنخع والكذب والظلم والباطل ورغيف العيش أبو مسامير، والبؤس والعيال اللي قاعدين من غير شغل.. والتردي في أداء الخدمة، وعجز الموازنة ونهب فلوس الدولة وأراضيها وأسهمها.. والضغط على الروح والنفس، والتهريب والمخدرات، وأطفال الشوارع، والمطلقين والعوانس والمتفقهين.. والمستشرقين والمتنطعين والمستقلين والطامعين في السلطة وبائعي الدين بالدنيا.. واللي أكلوها ولعة.. والذين يفرقون دينهم شيعًا وأحزابًا."

"اسأله يا عم عن رأيه في الناس دي اللي طلعت فجأة تتكلم عن الزندقة والكفر زي بتوع القرن 18، يحتقنهم جهل مطبق بأن محدش يملك إنه يكفر حد، وسابوا كل مشاكل البلد."

"اسأل حمارك إيه رأيه في حال بلد منتشرة فيها كل هذه الموبقات. هل عندهم قدرة يتحملوا اللوز اللي في حناجرهم دي من اتهام الشعب المصري بأن فيه زنادقة وكفرة وديمقراطيين ومشركين؟ ومبيقدروش يقروا تاريخ ولا حتى سياسة يحلوا بها مشكلة الوطن؟ علشان الناس تستريح والدين يشقشق في القلوب وتنضف بلدنا من الغش والرشوة والذل والانتهازية."

قلت له: "ماشي يا حمار أفندي، حافكر في كل اللي أنت بتقوله ده وراح أرد عليك إن شاء الله قريب، بس أما يشغلوني في التلفزيون ويجعله عامر."