البنت " ميناتى هاتو " بنت هندية إنما أيه ياحمار جميلة قوى ... تقولشي بنت مهراجا هندى ....عينان سوداء واسعة كعيون المها، صفاء مقلتها كصفاء السما . هـيفـاءُ فـاتـنةَ القوام. وثغرٌ فـاتـنٌ مـن غــير "روجٍ" ومابتحطش على شعرها "الزٌنجٌفر"
- هأ ها .. هأ ..هههههه
- أيه بقى .. هيء هيء .. دى ياحمار؟
- اصلك يافرشوطى افندى عليك كلام يموت من الضحك ـ" طيب " ميناتى هاتو " هندية وجميلة . وثغرٌ فـاتـنٌ وعرفناها ... إنما ايه "الزٌنجٌفر" ده ؟
- صحيح أنت حمار ... اصبر وانا افهمك... "الزٌنجٌفر" ده هو الدليل على إن " ميناتى هاتو " لسه عذراء ...
- "قال هامساً: انا مش فاهم حاجة ، و" بعد لحظه: قال الحمار: ايوه... ايوه .. يعنى اللى عندها "الزٌنجٌفر" تبقى عذراء؟
-لآ ياحمار مش كدا - "الزٌنجٌفر" ده صبغة حمراءـ نسوان الهند بيحطوه على فرق الشعر واسمه الفيرميليون "ولما تشوف واحدة هندية صبغه مفرق شعرها تعرف ان المرأة دى متزوجة وزوجها حي .
-قال الحمار فرحا: ايوه ... ياحلاوة ياولاد.. فرشوطى باشا حايتجوز بنت مهراجا ما بتستعملشى "الزٌنجٌفر". وتلاقى البنت " ميناتى هاتو " دى وقعت فى غرامك وظنت انك " شاروخان " الوطن العربي ولا "شاهيد كابور" .ماهو طربوشك ده عامل عمايل جبارة.
- قلت ضاحكا : ياريت ياحمار ....!
- قال الحمار صارخا ... انت هتجننى امال أيه حكاية البنت " ميناتى هاتو " دى.
- البنت " ميناتى هاتو " دى ياحمار صعبانه عليا قوى ... لإنها وقعت فى غرام شاب وسيم اسمه " سيتاكانت روتراي "
- قال الحمار: والنبي "ميناتو هاتى" دى بنت خايبه قوى... بقى تسيب المهيب الركن فرشوطى على سنه ورمح ... وتقع فى غرام ... "ستى كنت دى" ... يكونشي بيعفر سجاير كنت زيك علشان كده اصبح إسمه ستى كنت ؟
- ياحمار ماتربسي مخك قوى كده .. ستك ايه وعمتك ايه.. إسمه " سيتاكانت روتراي " واد حليوه ومسبسب الشعرتين. وعذب اللسان و غاية فى الأدب والتهذيب والرقة".. اتقدم لخطبتها.- قوم أيه - بعد ما نال إعجاب الجميع.أهلها وفقوا على طول .
قال الحمار- بسرعة كده؟ وبدون خاطبة تشوف كعوب رجليها وشعرها وتتقصي عليها ان كان له فى الزواج ولا لأ ... وان كان عنده شقه وعربية ونيش ... ومروحه وغسالة بالكهرباء و...و......
- بس ... بس... اسكت ... انت مفكر إنهم شكلنا ؟
- طبعا .. ويمكن أصعب بكتير دوووول هنود يافرشوطى افندى وطول عمري كنت بحلم اتجوز أتانه من بتوع بووليود.
- لا ياحمار الناس دى عكسنا خالص... لما " الواد "سيتاكانت" أثار إعجابها وإعجاب كل أقاربها (وبحسب العادات المتبعة هناك عند البلد الذي تنتمي لها الفتاة الهندية ) كان يجب على عائلتها تقديم المهر للعريس.
- يعنى يا استاذ فرشوطى أهل " ميناتى " هما اللى دفعوا المهر للواد الحليوة "سيتاكانت" ياحلاوة ياولاد والمهر ده كان عبارة عن ايه؟
- حاجات بسيطة ياحمار ، فقط سيارة .. وصيغة كلها دهب، وكمان حصل من عائلة "ميناتو هاتى" على مبلغ نقدي قدره 600 دولار أمريكي.
-صرخ الحمار: ياناس ياهوه ... جاااااااى ....ونَهَقَ ، ثم شلت- وفر مسرعا يعدو وهو يغنى بدنا نتجوز على العيد من الهند وبكره نلبس الجديد ... انا رايح الهند."
- جريت وراءه لحد ما نفسي انقطع ، ثم امسكت به بعد أن هدأت من روعه . وقلت له : اصبر شوف اللى جري.
- نظر الحمار لى وقال هامسا ... يبقى الواد الحليوة "سيتاكانت" اكتشف ان البنت " ميناتى هاتو " صبغة شعرها بالبتاع اللى اسمه "الزٌنجٌفر" ده.
- مش كدا ياحدق - (وظللت اربت على ظهره لفترة حتى رفع رأسه فجأة وابتسم) - قال : يبقى الواد الحليوة "سيتاكانت" هو اللى صبغ الفلقة بالزٌنجٌفر.
- قلت :ياريت ... بعد سنة واكتر بدأت الشكوك تساور " ميناتي "
- ازاى بقى ؟
- الواد الهندى الحلو قعد يضحك على البنت الحلوة " ميناتي " بحجة الدين .
- وصدقته ازاى ؟ ياعينى يا ميناتى ... ماكنشي يومك يا اختى ياصبره على المر واللبان الدكر الهندى يا اختى. بس قوللى يافرشوطى باشا الواد اقنعها ازاى بالدين؟
- فى البداية قال لها انه لن يجامعها ومش حا يكون بينهما أي تواصل ذو طابع جنسي، واتحجج بأنه قطع على نفسه عهداً دينياً يحرم عليه بموجبه مضاجعة أي من النساء حتى لو كانت زوجته.
قاطعنى الحمار قائلا - وفضلت ياعينى البنت " ميناتي " متجوزة المخدة وصابرة اكتر من سنه .... ومشكتش فيه ولا مرة ..؟
- لآ شكت وقررت بعد ما داخت ان تحسم الأمر. فانتهزت الفرصة وخلت عمك "سيتاكانت" بيستحم ودخلت عليه.
- اووبا ... واكتشفت المصيبة .وجدت معاه واحده تانية فى الحمام.يادى الفضيحة.
- لا ياحمار اكتشفت ان الشاب الوسيم زوجها "سيتاكانت".. امرأة.!
الحمار : هههههههههههههههه
نشر فى الجرائد التالية:
الجمهورية والعالم
دنيا الرأى
مصرس
ليست هناك تعليقات:
إرسال تعليق
فرشوطيات تشكركم على هذا التعليق الرائع -ونتمنى لكم اياما جميلة - ويسعدنا تكرار الزيارة ,