التحرش والسلاح الانجليزى للمرأة العربية

سمعت أخر الأخبار يافرشوطى أفندى؟
- الأخبار كتير قوى وعلى قفا مين يشيل ويسمع ياحمار .. قوللى اى اخبار تقصد ؟
قال الحمار : لا - لا - مش اخبار صفرا من اياها - دا خبر حلو عن الجارديان بتاع انجلترا ، الصحيفة بتقول ان فيه سلاح جديد للمرأة المصرية لمكافحة التحرش الجنسي.
- قلت :واشمعنى المرأة المصرية يا حمار؟  والسلاح ده اوتوماتيكى !! بيطخ على طول اللى يقرب منها ولا أيه الحكاية يا سيد الحمير؟
ضحك الحمار بسخرية وقال :بيطخ ايه ياباشا ... دا حايرسل رسالة نصية إلى جهاز كمبيوتر مركزي،والجهاز المركزى ده يرد على اللى بيتحرش بها...وكمان يعرض عليها المساعدة ..ويقعد ينصحها نصييحة جبارة ويقول لها ازاى تتعامل مع اللى بيتحرش بيها .
- ههههههه حلو قوى الموضوع ده ياحمار .... يعنى هو يتحرش وهى تتصل ... يتحرش !.. والجهاز ينصح فيها... طيب افرض مثلا مثلا يعنى يا حمار افندى ان الجهاز المركزى بتاعك ده عطل. الضحية تعمل أيه؟
قال الحمار : تبقى تأخذ معها الجوال وتصوره وبعدين تبقى تتصل بالجهاز المركزى والجهاز ينصحها فى التحريشة الجاية ... صعبه دى .
-لا والله ياحمار دى وصفه سهله ... سهله قوى ... بس قول لى هما بيتحرشوا إزاى وليه؟
قال :ليه دى بقى إسأل عنها حكومتك وشيوخ الرضاعة ... وشيوخ الفضائيات . يافرشوطى افندى -انتم اكثر حاجة شاطرين فيها  الكلام، والفتوى فى كل حاجه . انت تعرف يا استاذ فرشوطى أن 83% من المصريات و93% من الأجنبيات تتعرضن للتحرش سواء باللمس أو بالإساءة اللفظية أو بالتعقب.
- ايه ده ياحمار افندى هى الدراسة بتاعتك دى بتسجل كل واحد يحك فى واحدة بدون قصد ... ولا حتى يلمسها غصب عنه !! ويسجلوها تحريشه والعداد يعد ..؟
قال الحمار : الإحصائية دى انتم اللى عملتموها مش احنا. وللتحرّش الجنسي أشكال مختلفة- باللمس والهمس والايحاءات - التحسس، النغز، الحك، الاقتراب بشكل كبير
- قلت : ياحمار افندى متعرفشي ان احنا عايشين على خمس مساحة مصر ... والحياة زحمة ،زحمه، ومحدش عنده رحمه على رأى المقدم احمد عدوية - وزحمة الحياة ألقت بظلالها على العلاقات الأسرية والاجتماعية وعلى الشارع، وانت سيد الحمير وعارف ان لو انا حشرتك فى زريبه مع عشرات الاتان الجميلات ايه اللى حا يحصل لك .وفى الحالة دى حانضطر نجيب لكم اختراع انجلترا الجديد ده.
ضحك الحمار - وضرب بالجوز وشهق ونهق.
قلت - انت فرحان قوى - زحمة الحياة ياحمار - وكثرة الانشغالات- وسفر عائل الاسرة - وافلام الجنس - و كهنة الاديان - و. و . كلها فرضت أمورا وسلوكيات مطينة على بنى البشر.
قال الحمار : فعلا ..والحل سهل وبسيط... اولا تقوم الحكومة بتخفيف الازدحام الزائد في المدن واخلاء العشوائيات في البلاد ،وبناء مدن جديدة.وبدلا من الاستثمار فى الهيافة نستثمر الإنسان ... هل تعلم يافرشوطى بيه ان بثمن كوبري واحد كنتم بنيتم بثمنه عدة مدن جديدة .
- قلت ... كلامك كله زين بس مين يسمع ومين عايز يحل ... انهم يريدون ان تظل الحالة هكذا ، تفضل مرعبة ،وزحمة-  لكى يخيفونا والجرائد تسكع اخبار سكلنس خالص...
ولا يمكن ياحمار علشان نوفر استهلاك الكهرباء بعد ما نصهد -نسخن - وندفى بعض بدل مانشتري سخانات فى الشتا بالعملة الصعبة .
------------
بعد مقال المهيب الركن فرشوطى بعام الواد"هيبار سياهرول غافور"،قعد يفكر فى حل للمشكلة المهببة دى - قوم ايه- عمل جزمة عجيبة قوى مضادة للتحرش تكهرب اى واحد يقرب من النسوان - مش مصدقين - ؟
طيب شوفوا فيديو الواد "هيبار سياهرول غافور"
نشر فى
جريدة الاهرام

-----
-------------