الواد زعبوله داير فى البلد وعمال يلسن ويقول : رئيس حى شرق شبين الكوم بيشتغل جامد قوى ياولاد ،وبيبين شغل جبار وبدل مايعمل إزالة للمبانى اللى على الارض الزراعية من شبين الكوم لحد مدينة السادات - ساب دا كله وطلع على ارض زراعية بجوار كوبرى مليج - وراح بالمعدات والبوليس وهد بيت لناس غلابه عايشه على هذه الارض من مئات السنين - والمصيبة ياعم فرشوطى انه راح ساكع خبر على صفحة حى شرق شبين الكوم - وقال تمت إزالة "تعدى منزل "على املاك الدولة.
قلت: تعدى منزل ازاى ياواد يازعبوله؟ يكونشي المنزل فط نط على الاملاك وراح احتلها؟
قال زعبوله - ايوه ياعم فرشوطى - دا منزل عفريت قوى بيتعدى على كله حتى على النسوان.
قلت : يستاهل طالما منزل بصباص وبيطنطط على املاك الدولة. هى سايبه ولا سايبه يازعبوله .
قال زعبوله : هى مش سايبه - دا كان هناك مولد .
قلت : كل ده علشان تعدى منزل ؟ امال لو كان تعدى فيلا كان ايه اللى حصل.؟
قال زعبوله - اسكت ياعم فرشوطى اسكت - دا كان واخد معاه - عاصم البنا .
قلت : طيب ماهو راجل شهم وجدع - الراجل عايز يخلى البنا يبنى المنزل من جديد للناس الغلابة احس يقع فوق نفوخهم.
قال زعبوله ضاحكا : دا البنا ده سكرتير حى شرق ومدير التنظيم - ومعاه كمان رجال الامن - والشرطة - والحماية المدنية -
- كل ده علشان تعدى منزل يازعبوله؟
- ايوه ياعم فرشوطى اصله طلع منزل عفاريتى.
- والمحافظ خد خبر يازعبوله؟
- خد كتير ياعم فرشوطى
- قول الحمد لله يازعبوله انه رئيس حى شرق - دا لوطلع رئيس حى غرب كان عمل ازاله لبحر شبين راخر .
- الحمد لله ياعم فرشوطى - احسن كان كتب على صفحة - رئيس حى شرق شبين الكوم - تمت إزالة بحر شبين الكوم بسبب "تعدى قرموط سمك ".
---
نشر فى:
الجمهورية والعالم
وكالة حقوق الإنسان
جريدة شباب مصر
ليست هناك تعليقات:
إرسال تعليق
فرشوطيات تشكركم على هذا التعليق الرائع -ونتمنى لكم اياما جميلة - ويسعدنا تكرار الزيارة ,