"الملوخية والبامية: حكاية طريفة من حياة زعبولة في زفتى"

---

الواد زعبولة عمال يصرخ في الكفر كله ويقول: "الملوخية هي السبب يا خويا... الملوخية هي السبب يا خلق هوه..."

قلت وأنا أقترب منه: "ده جدر البطاطا هو السبب يا ضنايا."

قال: "المرة دي الملوخية هي السبب يا عم فرشوطى!"

قلت باهتمام: "ده فيلم جديد ده ولا إيه يا واد يا زعبولة؟"

قال: "يوووووه دي مصيبة كبيرة قوي يا عم فرشوطى."

قلت متسائلاً: "مصيبة إيه دي يا وله؟"

رد زعبولة ونبرة الحزن في صوته: "الواد سعد قتل محاسن مراته يا عم فرشوطى."

"نهارك أسود يا زعبولة... قتلها فين وازاي يا بوز الأخس؟"

قال: "في قرية دهتورة يا عم فرشوطى."

قلت: "الله يخرب بيتك، ما تفوق يا ابني! إنت واكل تاتورة؟ هي فين دهتورة دي؟"

ضرب كفاً على كف ووضع يده على جبهته وقال ضاحكاً: "حلوة - حلوة - تاتورة ودهتورة، تنفع أغنية يا عم فرشوطى."

قلت صارخاً: "ما تقول يا وله جك حش وسطك، هي فين تاتورة ولا دهتورة دي؟"

وبصوت مرتفع قال: "دي في زفتى يا عم فرشوطى - في زفته!"

قلت: "نهار أبوك زفت وقطران مغلي، إيه الحكاية يا بن الـ...؟"

قال: "يا عم فرشوطى قرية دهتورة دي تابعة لمركز زفتى."

أمسكت بتلابيبه وأنا أصرخ: "انت عايز تنقطني، زفتى دي فين يا قطران؟"

قال وهو يقع على ظهره من شدة الضحك: "دي تبع طنطا، شالله يا شيخ العرب - أروح أجيب لك شوية حمص يا عم فرشوطى؟"

قلت: "ما تقول كده من الصبح - وإيه بقى اللي خلّى سعد يقتل محاسن هناك؟"

قال: "الملوخية."

قلت: "إزاي يا وله؟"

قال: "الحاج سعد قبل ما يروح الشغل طلب من خلتك محاسن تطبخ له ملوخية ولما رجع الظهر يتغدى لقى زوجته طبخة بامية..."

قلت: "وإيه المشكلة؟ ملوخية بامية، كله أكل."

قال: "لأ مش كله أكل، فيه فرق بين البامية والملوخية، وعلشان كده سعد زعل قوي واتخانق مع مراته محاسن وبقت فضيحة. سعد اتنرفز وراح جايب المسدس وقتل زوجته محاسن."

قلت: "وماتت مراته علشان الملوخية يا زعبولة؟"

قال: "أيوه يا عم فرشوطى قتلها وحاول الانتحار، قبل أن يتم القبض عليه."

قلت: "أمال لو كانت خبيزة كان إيه اللي حصل؟"

نشر فى صحيفة
شباب مصر